Creative dotPen

बचेराहरु निदाएपछि जस्केला नांघेको छु मैले , वाचाल पाइलाहरु मेरा , अभिशप्त अन्धकारको नियात्रा अगाडि निशा उध्रिएर पोखिएको उषा मेरै गन्तब्य पारी पाखा र पाङ्गरमा ग्वालाहरुको भोको र मलिन स्वर , अघि अघि हिड्दै गरेका गौखुरका फट्फटे ध्वनी , अनि तीनका पदचापले उडाएको धुलो बडारेर पवनले मेरो घ्रांणमा थोपर्छन् आहा म हुर्केको माटोको सुगन्ध !

डिसेम्बर ३१ मा मेरो नाममा अमेरिकाबाट एउटा पार्सल् आयो । नयाँ बर्षको शुभकामनास्वरुप उस्ले मिठाई पठाएकी रहिछे । यस्पाली ऊ फिजिमा छे । मिठाई चपाँउदा चपाँउदै उसङ्गको भेटघाट ताजा भएर आँउछ । मेरो धेरै शोखहरु मध्य एक हो नयाँ बर्षमा नयाँ साथी बनाउने । बेग्लै परिवेश र कथा बोकेको बिल्कुल नौलो साथी । केही बर्षअघि मनास्लु क्षेत्रको ट्रेकिङ जाँदा त्यो संयोग मिल्यो । बनाउछु भनेर बनाएको साथीभन्दा घटना र ब्यथाको संयोगले बनेका साथी बढी घनिष्ठ हुन्छन् । नयाँ बर्षको समय थियो । चिसो मौसममा जिन्दगीको गियर बदल्न हामी हिंडेको थियौँ ।